Arunachal political party te'n China an dem

Prime Minister Narendra Modi-a'n Aruna­chal Pradesh statehood day February 20-a a hman­pui vanga China-in a lungawi loh thu a sawi chu state chhunga political party te'n an dem thu an tarlang.

China chuan Aruna­chal hi ram inchuh a ni a, Prime Minister Modi-a'n a tlawh hi kan duh lo a ni, a ti.

Arunachal Pradesh Congress Committee (APCC) president Padi Richo chuan China thiltih an dem thu sawiin, Beijing chuan Arunachal Pradesh hi India ram chhung a mi a ni tih a theihnghilh a ni, a ti a, India President emaw Prime Minister-in Arunachal an tlawh dodal chu China kalphung pakhat a ni, a ti.

Arunachal BJP unit pawhin China an dem thu an tarlang bawk a, China chuan eng lai mahin India ram hotute'n India rama state an tlawh hi an dodal thei lo tih an sawi.

BJP State president Tai Tagak chuan, "India khua leh tui kan ni hi kan lawm a, Indian kan nihna hi kan chhuang a ni. Kan nihna leh kan state din­hmun hi a chiang tawk a ni," a ti.

Tagak chuan, "China hian ram zauh a tumna policy hi a tihtawp a hun tawh a, hei hi khawvelin a pawm tawh lo a ni," tiin a sawi bawk.

Modi-a'n Arunachal a tlawh China-in a dodal chu Arunachal Civil Society (ACS) pawhin an lung­awi loh thu an tarlang.

ACS chairman Patey Tayum chuan, "China hi India ramchhung thilah a inrawlh thei lo a, Arunachal hi ram inchuh tiin a sawi thei lo bawk. Arunachal hi hun rei tak kalta aṭanga India ram bung khat a ni," a ti.