Tuensang-ah curfew puan chhunzawm

Nagaland-a Tuensang district thuneitute'n curfew an puan chu February 21 leh 22-a an thlahdul hnuah Thawhṭanni khan Tuensang khuaah darkar 24 chhung curfew puan leh a ni.

Tuensang Additional SP & PRO chuan bo­ruak ṭha lo inmung a la awm avangin curfew chu darkar 24 chhung pawhsei a ni, a ti a, police te'n khauh taka venhimna an kalpui thu a sawi bawk.

Tuensang-a Yimchungru leh Chang hnamte'n ram an inchuh vanga an inkara buaina a chhuah avangin February 6 khan mi pahnih an thi a, February 14 khan mi pakhatin a thih phah leh a ni.

Tuensang district magistrate chuan Code of Criminal Procedure (CrPC ) Section 144 tlawh­chhanin Tuensang khua leh a chhehvelah February 8 aṭang khan curfew a puang nghal a ni.

Hetihlai hian Nagaland Pradesh Congress Committee (NPCC) chuan hnam pahnihte inkara remna leh muanna a awm theih nan remna palai hna thawh an tum thu an puang a, hnam pahnih hruaitute hmuh an tum.

Eastern Nagaland Women Organisation (ENWO) pawhin remna siam tumin February 18-21 inkar khan Tuensang district-a buai chhuahna hmun an tlawh a, district thuneitute leh police te chu remna a awm theihna atana theihtawp chhuahpui an inhuam thu an hrilh.