Nagaland-ah swine flu vei hmuhbelh

Nagaland-a Integrated Diseases Surveillance Programme (IDSP) nodal officer chuan thu­chhuah a siamah swine flu (H1N1) natna vei hmuh belh a ni tih a tarlang.

Natna vei hmuh­chhuah thar nen hian Na­ga­land-a swine flu natna vei hmuhchhuah hi pathum an tling tawh a ni.

Swine flu natna vei an hmuhchhuah thar hi February 20 khan New Delhi aṭangin thlawhtheihnain Kohima-ah a haw a, a haw hmain New Delhi-ah a inentir a, a result hi a haw tuk February 21, Inrinni khan hriattir niin, H1N1 natna a vei tih hrilh a ni.

Nagaland health department chuan India ram khawpui dang aṭanga Nagaland-a haw turte chu damdawi-in remchanga inentir hmasa turin a ngen a, natna doletna atan doctor leh medical team te chu anmahni post-ah ṭheuh awm vek turin a hriattir.

February 18 khan Naga hmeichhe pakhat Chennai aṭanga Dimapur-a haw chu swine flu a vei tih hmuh­chhuah a lo ni tawh bawk a, hemi hnu hian mipa pakhat Delhi aṭanga Dimapur-a haw chu H1N1 natna vei a tih hmuh­chhuah a ni leh bawk.