Assam sorkar thuchhuak HC-in titawp lailawk

Thingpui huan­a hnathawkte hnena hnathawh loh ni, Pathian­ni hlawh pe tel tura Assam sorkarin thingpui huan neitute hnena hriat­tirna a chhuah chu Gauhati High Court chuan a titawp lailawk.

State Labour and Employment department-a commissioner chuan nikum December 11 khan Assam sorkar aiawhin thuchhuah a siam a, unskilled labour te chu hnathawh loh ni, Pathian­ni-ah pawh working day-a an hlawh zat pe turin tea company thuneitute a hriat­tir a ni.

Indian Tea Association chuan Assam sorkar thuchhuak hi Gauhati HC-ah an khing a, Justice Ujjal Bhuyan-a awmna HC bench chuan sorkar thuchhuak hi kaltlangpui rih lo turin a titawp lailawk a ni. April 20-ah hemi chungchangah hian hearing neih a ni leh ang.

Indian Tea Association aiawha HC bench hmaa inlan, counsel chuan Minimum Wages Act tlawh­chhanin Assam sorkar hian thuchhuah a siam lo a ti a, thuchhuah a siam dawnah thingpui huan nei­tute a rawn lo a ni, a ti.

"Thingpui huana inhlawhfa te chhawr dan chungchang ngaihtuah turin state sorkar chuan kum 1952 khan Chetia Committee a din a, committee chuan hnathawh loh ni-a hnathawkte hlawh siamsak dan tur pawh a tarlang a, mahse state sorkar chuan hriat­tirna a siamah hian committee rawtna pawh a zawm lo a ni," tiin Tea Association te counsel chuan court a hrilh.