Arunachal : Kangmei chhuak vangin in 24 a kang chhia

Arunachal Pradesh-a Pareng khuaah Nilaini zan khan kang mei chhuakin chenna in 24 a kang chhia. Thuneituten an tarlan danin kangmei vang hian mi pahnih an hliam a, thi erawh an awm lo thung.

Pareng khua, Siang district-a kangmei chhuak hian thlam pali a kang chhe tel a, chenna in pasarih chu kang tel mah se ṭhelh mih hman a ni thung. District Disaster Management Officer (DDMO) Obang Apum chuan hliam tuar pahnihte chu ngaihtuahawm an ni lo tih a sawi. Kangmei hi vawk rawhna mei aṭanga inṭan nia tarlan niin, Aalo fire brigade chuan kang ṭhelh hna hi an thawk a, district SP leh ADC chu a hmunah kalin kang meiin a tih chhiat hlut zawng an chhut bakah chhiatna tuartute ṭanpui hna an thawk bawk.

Siang District Students Union leh DDMO chuan Ningani khan kangmei tuartute tan ṭanpuina an sem chhuak a, hemi bakah hian khawtlang pawhin chhiat tawkte hi an theih ang tawkin an chhawmdawl nia tarlan a ni. Adi Students’ Union (AdiSU) chuan chhiat tawkte tan vawiin leh naktuk hian vehbur an khawn sak dawn a ni.