Manipur : Kuki-Zo ten Assam Rifles sawn chhuah an duh lo

Committee on Tribal Unity (CoTU) huaihawtin kar liam ta Inrinni, August 3, 2024 khan Kangpokpi, Manipur-ah Kuki-Zo hnamte chuan kawng an zawh. Kangpokpi leh Churachandpur district aṭanga Assam Rifles sawn chhuah tumna an duh loh vangin kawng hi an zawh a ni.

Kuki-Zo hnamte hian tualchhung buaina vanga thite hriat rengna hun, 15th Remembrance Day hun an hmang a, he hunah hian Assam Rifles sawn tumna awm chu an duh lohna lantir nan Gamgiphai, Sardar Hills-ah kawng an zawh zui a ni. Assam Rifles sawn chhuak tura sorkarin thutlukna a siam tawh chu sut leh turin an ngen a, chi leh chi inkara buaina chhuak leh remna a awm theih nan AR-te chu an pawimawh a ni, an ti.

CoTU thupuangtu, Ng. Lun Kipgen chuan home minister-in Kuki-Zo hnamte chenna hmun aṭanga AR sawn chhuah a tum vangin Remembrance Day vawi 15-na chu nuamin an hmang thei lo a, hlauhna leh thil lo thleng tur huphurhnain an khat niin a sawi. "Kuki-Zo leh Meitei-te him nan Assam Rifles hian buaina a sosan lai khan an thawhhlawk hle a ni" a ti bawk. AR chuan Imphal aṭangin tlangram lamah Kuki-Zo te him takin an hruai chhuak a, chutiang bawkin tlangram aṭangin Imphal phairuamah Metei-te him takin an hruai thleng bawk tih a sawi.

Kipgen chuan prime minister Narendra Modi chu sorkar thutlukna sut leh turin an ngen a, AR sawn chhuah hi an kaltlangpui a nih chuan nasa zawka lungawi lohna lantir an tum thu a sawi bawk. Union home minister Amit Shah hnenah pawh ngenna hi an thlen bawk a ni.