Tripura : Khuarel chhiatna vangin chenna in 25 chhia

Tripura-ah kar liam ta Zirtawpni khan ruah sur nasa vangin state chhung hmun hrang hrangah chhiatna a thleng a, chenna in 25 chhiain mi 12 chhawmdawlna in lamah sawn chhuah an ni.

State Emergency Operation Centre-in a tarlan danin, Khowai district-a Teliamura area-ah chenna in pakhat luah tlak loha a chhiat bakah in dang pathum a chhe bawk. Karbook, Gomati district-ah ruah sur nasa vangin hmun thum laiah leimin a thleng a, PWD leh Forest department chuan leimin then hna an thawk nghal a ni. Belonia, Sabroom leh Santirbazar sub-division ah leimin leh thing tlu vangin kawngpui a ping a awm bawk.

Tripura chhunga lui lian - Howrah, Khowai leh Gomati te chim chin chuan hlauhawm chin la pel lo mah se Muhuri lui erawhin a pel tawh thung a, Feni lui pawh a chim chin a sang chak hle nia tarlan a ni. Indian Meteorological Department (IMD) chuan Gomati leh South district-ahte ruah sur a la tam zel dawn nia a tarlan vangin state chhungah tuilian vangin buaina a thlen a hlauhthawnawm hle. IMD hian ruah sur bakah hian thlipui leh ṭek tla a thleng thei nia tarlangin Tripura chu inralring turin a chah.