Dan loa lut mi 10,675 man chhuah an ni : Manipur CM

Manipur chief minister N Biren Singh chuan kum nga chhungin an state-ah dan loa cheng mi 10,675 man chhuah an ni tih a sawi. Heng mite hi Myanmar, Bangladesh, Norway, China leh Nepal aṭanga lutte an ni.

Chief Minister Singh hian dan loa Manipur chhunga chengte chungchang hi Congress MLA Okram Surjakumar Singh zawhna a chhannaah a sawi a ni. District hrang hranga dan loa lut awm zat tarlang bawkin, Imphal West-ah 11, Kakching-ah paruk, Churachandpur-ah 150, Chandel-ah 1,895, Tengnoupal-ah 2,406, Ukhrul-ah 3, Kangpokpi-ah 2, Kamjong-ah 6,199 bakah Imphal East leh Bishnupur-ah pakhat ve ve an awm bawk tih a sawi.

Manipur CM chuan dan loa rawn lut zinga 85-te chu an ram lama thawn kir an ni tawh a, mi 143 chu detention centre-ah dah mek an ni tih a tarlang bawk. State sorkarin anmahni enkawl nan hian Rs nuai 85.55 a seng ral tawh a ni.

Tualchhung buaina a inṭan hma khan Churachandpur, Chandel, Tengnoupal, Kamjong leh Pherzawl district-ahte dan loa lut dap niin Myanmar aṭanga rawn lut mi 2,480 chu man chhuah an nih thu CM chuan a sawi. Sorkar laipui chuan Indo-Myanmar ramri hung hna a thawk ṭan tawh tih sawi bawkin, border pillar 79 leh 81 inkara kilometer 9.214 a thui hung zawh a ni tawh a ni, a ti. Sorkar laipui chuan Manipur ramri pum hung turin hma a la mek tih a sawi bawk.