Assam : Tata Group-in semiconductor siamna hmun din dawn

Tata Group chuan Jagiroad, Assam-ah semiconductor rem khawmna leh enchhina hmun (assembly & testing center) an din dawn a, ‘Bhumi Pujan’ ceremony hmangin lawmna neih niin Assam chief minister Himanta Biswa Sarma chuan a telpui.

Tata Group Chairman, N. Chandrasekaran chuan semiconductor siamna hmun an din tur chu thil chhinchhiah tlak tak a nih thu sawiin helai bial chengte sum dinhmun chawi kang theitu a ni, a ti. Semiconductor siamna hmun chuan hna 27,000 chuang a siam belh dawn niin a sawi a, semiconductor siamtu company dang leh helam kaihhnawih siam chhuaktu company dangte chu a hip luh zel a beisei a ni. Tata Group chairman chuan tun hi bul ṭanna chauh a ni tiin, semiconductor siamna a ṭhan chhoh zel hnuah Assam chu electronic siam chhuahna hmun pawimawh tak a nih ngei a beisei tih a sawi bawk.

Chief Minister Sarma chuan semiconductor siamna hmun sak nan hian Rs vbc 27,000 ruahman a nih thu sawiin, prime minister Narendra Modi leh mi pawimawh dang, semiconductor siamna din a nih theih nana hmalatute chungah lawmthu a sawi. Sarma chuan India-in khawl thiamna lama khawvel hma hruaitu nih a tumna kawnga hmalakna pawimawh tak a nih thu a sawi bawk. Kumin chhungin a siamna hmun sak hna hi thawh ṭan a ni anga, nakkum kum laihawlah a phase khatna sak hna zawh hman tum a ni.