Assam-ah Oil Investment atan vaibelchhe 6,000 ruahman a ni

Union Petroleum Minister Dharmendra Pradhan chuan Zirtawpni khan Hydrocarbon Vision Plan 2030 hnuaiah Assam-a Oil Investment atan vaibelchhe 6,000 ruahman a nih thu a sawi.

Hydrocarbon Vision 2030 hi hmarchhak tan bika duan a ni a, hemi atan hian avaiin cheng vaibelchhe 1,30,000 ruahman a ni. Heng zing aṭang hian Assam bikah vaibelchhe 80,000 hman a ni dawn a, Public sector oil firm chuan sorkar kum kal mekah vaibelchhe 6,000 hu invesment a kalpui dawn a ni. Heng sum hmang hian terminal, pipeline, market leh thil dang te thawh a ni ang. Pradhan chuan hna chu thawh a nih tawh thu sawiin, he mi chungchanga hmalak dan tur te Chief Minister Sarbananda Sonowal, ministry official leh oil sector PSUs te nen sawiho a ni a ti. Hmarchhak bik tan oil thlitfimna refinery (7 MMTPA -16 MMTPA) pali din tura ruahman a nih thu Union minister chuan a sawi bawk.

Hydrocarbon Vision 2030 hi hlawhtling taka kalpui theih a nih chuan hmarchhak chuan kawng tam takah hmasawnna a hmuh tur thu Pradhan chuan a sawi a, infrastructure-ah nasa takin hma a sawn ang a, ṭhenawm ram Bangladesh, Nepal, Bhutan leh Southeast Asian ram te nen insumdawn tawnna ṭha zawk a awm thei dawn a ni a ti. Assam-ah hian hydrocarbon sector tihchangtlun nan sorkar laipui chuan oil field 12 zet din turin hma a la mek a ni. Pradhan chuan oil tam zawk thar chhuaka state dang tan pawha thawn chhuak thei tur khawpin Assam chuan hmabak eng tak a neih thu a sawi. Minister chuan sawi belhin, Assam-ah hian tun dinhmunah liquid petroleum product chu kg-ah Rs. 62 a ni a, chu chu national average kg-ah Rs. 138 aiin a tlawm zawk a, electrict hman man pawh a san loh thu a sawi. Oil, LPG leh natural gas te thawnchhuahna turin km 5,000-a thui pipeline siam a nih tur thu Pradhan chuan a sawi bawk.

He tih lai hian Pradhan chuan oil royalty pek chungchangah Assam chu a hmingṭha lo tih sawiin, sorkar laipui nen ṭangkawpa hmalak a ṭul thu a sawi a ni. Kum 2014 khan Oil India leh ONGC te chuan royalty-ah hian vaibelchhe 1,450 an chhung a, Supreme Court chuan kum 2014 aṭang khan oil firm zawng zawng te chu royalty pe vek turin hriattirna a lo chhuah tawh.