NEDA ten PM hnenah Memorandum thehlut

North East Democratic Alliance (NEDA) chuan Ministry of DoNER hnuiah hmarchhak tan vaibelchhe 800 ruahmansak turin Prime Minister Narendra Modi hnenah ngenna an siam a, heng zinga 10% chu Non Lapsable Central Pool of Resources (NLCPR) ni turin an beisei tih an sawi.

Prime minister hnena Memorandum an thlenah hian Assam Chief Minister Sarbananda Sonowal, Assam minister leh convenor of NEDA, Himanta Biswa Sarma, Arunachal Pradesh Chief Minister Kalikho Pul, Nagaland Chief Minister TR Zeliang, Meghalaya Lok Sabha member leh NPP president ni bawk Conrad Sangma, Mizoram ex-Chief Minister Zoramthanga, Assam AGP president Atul Bora, UDP working president Paul Lygndoh leh mi ṭhenkhat ten hming an ziak a ni. Memorandum-ah hian Ministry of DoNER leh North Eastern Council (NEC) ten chak zawka hmasawnna hnathawh an kalpui theih nan sorkar laipui chuan sum tam zawk ruahmansak rawh se tih chu an thupui ber a ni.

PM Vajpayee hunlai khan hmarchhak tan 'pool of non-lapsable fund' siam a lo ni tawh a, chu chuan kawng tam takah hmasawnna a thlen thu NEDA chuan an tarlang. NEC leh DoNER te chu hmarchhak tana hmasawnna hnathawh kalpui tak taktu an nih thu an tarlang bawk. Prime Minister hnenah hian Non lapsable central pool of resources (NLCPR) chu tihtawp a nih tak vangin Ministry of Development of the North East Region (DoNER) leh North East Council (NEC) te chu sum tam zawka vur a ngaih thu an thlen a, DoNER leh NEC hnathawh nana kum khata vaibelchhe 800 vel ruahman ṭhin chu beitham an tih thu an thlen bawk.