AP-ah kum 2017 chhungin eng pek vek tum

Arunachal Pradesh Power Minister Tenzing Norbu Thongdok chuan state sorkarin power intodelhna kawngah hma a la mek tih sawiin, kum 2017-ah chuan in tinah eng pek theih beisei a nih thu a sawi. Union Minister of State for Power Piyush Goyal chuan Arunachal pradesh-in hydro-power, solar leh thermal project lama hma a sawn zel theih nan a thlawp niin Thongdok chuan a sawi bawk.

State power minister chuan, "State chhunga transmission line-in a thlen phak lohna hmunah te eng pek a nih theih nan hma lak mek a ni a, heng mite tan hian solar voltaic system ruahmansak an ni" a ti. He an hmalakna hi sorkar laipui chuan a phurpui hle tih sawiin, "Union MoS Power Piyush Goyal chuan sorkar laipuiah scheme kalpui tura ngenna thlen turin rawtna min siam a ni" a ti.

AP-ah hian power lama intodelhna turin project ṭhahnem tak kalpui mek a ni a, hei hian an state mai bakah state dang te tan pawh chhenfakawm tak tur a nih thu tarlan a ni. Tunah hian power megawtt 100 pe chhuak thei tur chu peihfel a ni dawn hnai a, thermal plant pawh Kharsang-ah bun mek a ni. Coal and Power Secretary Anil Swarup chuan thermal plant project chu kalpui mek a nih thu sawiin, harsatna lian tham a awm lo a nih chuan a hun takah zawh fel beisei a nih thu a sawi. Union power minister chuan thermal project leh coal deposit kalpui mek te chu a thlawp thu a hrilh niin a sawi bawk.

State power minister Thongdok chuan sorkar laipuiin smart meter pek chhuah a remti a, power renchemna kawnga hmalakna pakhat LED bulb subsidy rate-a pek chhuah mek a nih thu a sawi ve bawk. Hydro power project kalpui mek chungchangah Ministry of Environment and Forests aṭanga harsatna an tawh mek chu Goyal chuan hmalakpui a tiam a, India rama eng la luh lohna zawng zawng eng pe tura hmalak mekna Deen Dayal Upadhyaya Gram Jyoti Yojana Scheme (DDUGJY) chu chak taka kalpui mek a nih thu a sawi bawk. DDUGJY hi Prime minister Naredra Modi chuan a lo tlang zarh tawh a, India ram, a bikin thingtlang khua eng la luh lohna zawng zawngah eng pek a nih theih nana hmalakna a ni. Kum 2018-ah chuan India ram chhunga eng la luh lohna khua zawng zawngah Deen Dayal Upadhyaya Gram Jyoti Yojana Scheme hmang hian eng pek vek hman tura duan a ni a, hmarchhak state eng emaw zatah a hlawhtlinna pawh hmuh chho mek zel a ni.