Arunachal-ah Governor leh Panchayat te inkawm

Arunachal Pradesh Governor JP Rajkhowa chuan Zirtawpni khan State chhunga ramri depa chengte chu ngaih pawimawh an ṭul thu a sawi. He mi kawngah hian state sorkar leh sorkar laipui te chu hma la turin Governor chuan a ngen a, ama grant aṭangin heng ramri depa awm te tan solar lamp 500 a hlan.

Panchayat hruaitute nen Raj Bhavan Itanagar-ah inkawm khawmna an nei a, Rajkhowa chuan, 'Ramri depa chengte tan hian communication, education, healthcare leh water supply te chu ngaih pawimawh ber tur a ni' a ti. International border hnaiah hian Monigong leh Pidi khua te a awm. Governor chuan inkalpawhna ṭha siam a ṭul thu sawiin, kea kalna kawng te chu one-lane-a siam a, one-lane te chu two-lane-a kan siam a ngai a ni a ti. Border Roads Organization (BRO) chuan heng hmunah te hian inkalpawhna ṭha siam turin hma la se a duh thu a sawi bawk. Panchayat hruaitute chuan, an thlai thar - apple, kiwi, strawberry leh thil dang te chu inkalpawhna ṭha a awm loh avangin sumah chantir a harsat thu an thlen ve bawk.

Hetihlai hian Arunachal Pradesh Chief Minister Kalikho Pul chuan China sorkar chuan Line of Actual Control bul hnaia khua te chu a ram chinah a rin lut mai ang tih a hlauhawm thu a sawi.

Pul chuan India-China border vel chu ven uluk a ngaih thu leh heng laia cheng te himna ngaih pawimawh a ṭul thu a sawi. Official statistic-a a lan dan chuan, India-China border-ah hian thingtlang khua 1,555 zet a awm a, mihring pawh mi 2,71,189 an cheng a ni. Heng mite chenna hmun hi Line of Actual Control kiang mai awm a nih avangin kawng tam takah harsatna a awm thei a ni Pul chuan a ti a, heng mite hmasawnna tur hian sorkar laipui pawhin sum tam zawk ruahmansak se a duh thu a sawi.