Hmarchhak huamchhung International Border siam ṭha dawn

Union Home Ministry official chuan hmarchhak huam chhunga International border te chu dan loa ramri kan ṭhin te, ral thuam hmanga sum dawng ṭhin te leh mipuite himna ngaih pawimawh a nih avangin a siam ṭhat hna thawh a nih tur thu a tarlang.

Union Home Ministry Border Management Secretary Susheel Kumar chuan, India ṭhenawm ram Bangladesh leh Myanmar aṭang tein dan loa ramri kana sumdawnna bawlhhlawh tak tak kalpui an awm tih hriat a ni a, hel pawl eng emaw zat chuan ramri hi an kan fo tih hriat a ni bawk. Phalna nei loa India rama lut an pun zel avang leh hmarchhak mipuite himna chu sorkar laipui chuan a ngaih pawihmawh avangin ramri thuam ṭha tur hian ruahmanna a siam a ni a ti. A bikin Assam-ah kum hnih chhungin dan loa Bangladesh aṭanga lut an pung chak hle tih hriat a ni a, he mi titawp tur hian hmalakna kalpui mek a ni. Assam leh Bangladesh inrina hi km 263 zeta thui a ni a, hei hi remchangah hmangin mi tam tak chuan ramriah hian ralthuam te an tawlh ru ṭhin tih hriat a ni. Assam-Bangladesh leh Myanmar te inrina hi km 1,640 zet a ni.

Tripura, Meghalaya, Mizo-ram leh Assam ten Bangladesh an rina hi km 1,880-a thui niin, Mizoram, Manipur, Nagaland leh Arunachal Pradesh ten Myanmar an rina chu km 1,640 zet a ni bawk. Susheel Kumar chuan Zirtawpni khan ni thum cham turin Tripura a tlawh a, sorkar mi pawimawhte a kawm. Union Home Ministry Border Management Secretary hian Meghalaya, West Bengal, Tripura Chief Secretary Yashpal Singh, Border Security Force senior official, District Magistrate leh mi pawimawh dangte ramri chungchangah hian inbiakna a neihpui bawk.

Rauhman dan chuan nakkum December-ah Tripura-Bangladesh ramri km 856 chu zawh fel tura tih a ni a, km 4,096 a thui West Bengal, Assam, Meghalaya, Mizoram leh Tripura-a India-Bangladesh border te chu a siam ṭhat hna thawh thuai tura tih a ni.