Naga Accord chinfel hun tur la hriat lo

Sorkar laipui leh National Socialist Council of Nagalim (Isak-Muivah) ten inremna an ziah a-
ṭanga kum khat dawn a liam hnuah pawh an buaina chu engtikah nge chinfel a nih dawn hriat mai theih a nih loh thu tarlan a ni. Naga hel pawl lian ber National Socialist Council of Nagalim (Isak-Muivah) te hian “full sovereignty” pek an phut a ni.

Zirtawpni khan Home Minister Rajnath Singh chuan meeting koin, Naga te nena inbiaknaa mi pawimawh, Joint Intelligence Committee chief, R.N Ravi chuan he huna hi a hmanpui. NSCN-IM ten passport leh flag hran pek an phutna chu ngaihtuah a nih hnuah June 20 khan sorkar laipui chuan a pawmpui a, he thu hi Kilo Kilonser (home minister) of the NSCN-IM R.H. Raising chuan a lo sawichhuak ve tawh bawk. Hetihlai hian Zirtawpnia meeting chuan inbiakna chu kalpui zel a ni a, inremna mumal tak siam a la ni lo an ti. Research and Analysis Wing (R&AW) chief Rajinder Khanna chuan he mi chungchang hi meeting-ah kalkhawmte hmaah kim chang takin a tarlang a ni. Inremna tluantling hi engtikah nge siam a nih ang tih chu sawi theih mai a ni lo Rajinder Khanna chuan a ti.

Hemi chungchangah hian Ceasefire Monitoring Group chuan April khan Delhi-ah meeting a lo buatsaih tawh bawk a, NSCN-IM te chu Nagaland leh Manipur aṭanga inlak hran tuma an beihna chu titawp tura ngen an lo ni tawh. Hetihlai hian August 3, 2015 khan sorkar laipui leh NSCN-IM te chuan ‘framework agreement’ an lo ziak tawh a, he inremnaah hian Prime Minister Narendra Modi leh T. Muivah te chuan Prime Minister chenna inah hming an ziak a ni.