Meghalaya Cabinet-in an state harsatna tawh mek sawiho

Meghalaya Cabinet chu Zirtawp-ni khan an ṭhu khawm a, an state-in lungalhthei hralh chhuah leh thawn chhuah kawnga harsatna a tawh mek an sawiho.

Coal Mines (Nationalisation) Act, 1973 tlawh chhana National Green Tribunal-in an state chhunga lungalhthei khurte a khuahkhirhsak bakah a thawn chhuah leh hralhna kawngah harsatna an tawh mek chu sutkian a nih theih nan hma lak an rel a ni. Cabinet chuan state mining and geology department chu sorkar laipui dawra harsatna ching fel tur hian beisei an ni a, Coal Mines (Nationalisation) Act, 1973 in a huam chinte zirchinga hma la tura tih an nih thu Chief Minister Mukul Sangma chuan a sawi. Coal Mines (Nationalisation) Act, 1973, Section 3 chuan state sorkar chu a ram leilung hausakna lakchhuah leh suma chantir kawngah dikna, thuneihna leh hlawkna tel theihna dan a pe a, chu chu sorkar laipui nena inremsiamna hmanga kalpui tur a nih thu tarlan a ni bawk. Sixth Schedule Para 12 A (b)-ah chuan Presidential notification chuan a nih angin state te chu central law-ah hian kawng tam takah ngaihhnathiamna pek theih an nih thu an sawi bawk.

Meghalaya-ah hian dan loa lungalhthei khur nei mi eng emaw zat an awm tih hriat chhuah a ni a, he mi vang hian kum kalta aṭang khan National Green Tribunal chuan state chhunga lungalhthei lakchhuah leh thawnchhuah kawngah khuakhirhna a lo siamsak tawh a, tun thlengin he an harsatna hi sutkian a la ni lo. "Lungalhthei laichhuah sa ṭhahnem tak chu he khuakhirhna avang hian khawih sawn lohin a awm mek a, sum leh pai nasa taka an chan bakah, fur ruahtui a tla ang a, chu chuan nasa takin an lui tui te a tibawlhhlawh thei dawn niin state sorkar chuan a lo tarlang tawh a ni. He mi chungchang hi vawi tam tak sawiho a ni tawh a, tunah chuan he kan harsat tawh mek hi sukiang turin kawl a eng ṭan a ni" Cabinet thu chhuah chuan a ti.

Sangma chuan, Mines and Minerals Policy, 2012 hmang turin sorkar chuan hma a la mek a, he policy hmang hian state chhunga lungalhthei che vel chu thunun a nih thei dawn a ni a ti. Green court chuan Meghalaya-ah hian lungalhthei khuakhirhna dan hmang tur hian April 17, 2014 khan thupek a lo chhuah tawh a ni. All Dimasa Students’ Union leh Dima Hasao District Committee te chuan Kopili lui chu Jaintia Hills-a coal mining thli avangin nasa takin a bawlhhlawh niin an sawi a, National Green Tribunal-ah thubuai ziak lutin chhui chian a nih hnuah Court chuan thupek hi a chhuah ta a ni.