Nagaland Governor-in ‘181’ Helpline tlangzarh

Nagaland Governor PB Acharya chuan hmei-chhiate laka hleih-lenna tih tawp a nih theih nan leh, hmeichhia tharum hmanga beihna tawk te tana ṭanpuina tur 'Women helpline – 181 chu Ningani khan District Hospital, Dimapur-ah a tlangzarh a, Sakhi- One stop Centre hawnna a nei nghal bawk.

“Sakhi-One Stop Centre” hi Centrally Sponsored Scheme (CSS) niin Ministry of Women and Child Development (MWCD) hmalakna kalpui mek a ni. Hei hian a tum, ber chu hmeichhe awm nêm zawk ten tharum hmanga beih an tawh ṭhinna titawp tur leh a tuar te chhan chhuah an nih theih nan hmalak a ni. Hetiang tuar te hi medical, psychological leh counseling hmang tea ṭanpui an nih theih nana din a ni. A thawh khatnaah hian state zawng zawngah centre pakhat ṭheuh hawn phawt a ni ang a, a ṭul dan anga hawn belh tur a ni ang. 181 Women Helpline hi engtik lai pawha biak pawh theih tura duan a ni.

Nagaland Social Welfare and Parliamentary Affairs minister Kiyanilie Peseyie chuan an state chu hmeichhia leh naupangte laka tharum thawhna lakah a fihlim lo tih sawiin, district tin aṭangin report dawn fo a ni a, tunah chuan hmalam panin kan kal thei tawh ang a ti. Mipuite chu 181 Women Helpline ṭangkai taka hmang tura a duh thu sawiin, nunau te laka tharum thawhna titawp tura ṭanrual a ṭul thu a sawi bawk. Department of Social Welfare Se-cretary Dellirose M Sakhrie, Nagaland State Commission for Women Chairperson Dr. Temsula Ao leh Dimapur DC Kesonyu Yhome te chuan ‘181’ Helpline tlangzarhna hun hi an hmanpui a ni.