Assam cabinet-in Majuli ditrict-a hlankai remti

Assam-a Bharatiya Janata Party a sorkar hnua a hmasa ber a tan Thawh-ṭanni khan cabinet meeting neih a ni a, Majuli chu District-a hlankai an remtih bakah, Kaziranga National Park-a Samak te chu sapeltute laka an him theih nan a venhimna tichang tura special task force dah belh Cabinet meeting chuan a remti.

State Excise and PWD minister Parimal Suklabaidya chuan Cabinet meeting hian ngun taka a ngaihtuahn hnuah Teacher Elegibility Test (TET) qualified teacher 10,000 lak te, sorkar Hospital-a thawk tur doctor 700 lak te chu a remtih thu a sawi. Heng bak hian Majuli Sub-Division chu August 31 2016 ral hma ngeia Distreict puitlinga hlan kai te a remti tih thuthar thehdarhtute hmaah a sawi a ni. Majuli hi inthlan neih zawh taka Chief Minister Sarbananda Sonowal dinna bial a ni.

Cabinet chuan Jahnu Barua Committee thurawn angin entertainment tax leh service charge te siam rem a remti a, Cinema enna ticket aṭanga service charge lak ṭhin Rs 40 (per ticket) chu Rs 8 (non-AC cinema hall) a tih hniam a remti a, AC cinema hall te tan Rs 12 lak a remti. Cinema entute aṭanga artiste welfare atan Re 1 lak a remti bawk.

Heng bakah hian District Mineral Foundation te chu lungalhthei khura thawk vanduiana tawk te ṭanpuina tura fee khawn a phal sak. Cabinet chuan Sarupathar-a martar Kushal Konwar thlan chu vawn ṭhata chei ṭhat an rem ti bawk. Heng bakah hian tharum thawhna avanga nunna chan journalist chhungte hnenah zangnadawmna cheng nuai thum ṭheuh pek a remti a ni.

Cabinet meeting hian assembly budget session chu July 18 aṭanga August 12 thleng neih turin an rel bawk.