Nagaland CM-in National Food Security Act tlangzarh

Nagaland Chief Minister, TR Zeliang chuan National Food Security Act (NFSA) chu Nagaland state-a hman
ṭan turin a tlangzarh ta. NFSA hi Dimapur leh Kohima district-ah te July 1 hman ṭan a ni dawn - District dang zawngah chuan August aṭangin hman ṭan a ni ang.

Nagaland Chief Minister chuan Food & Civil Supplies office-ah Thawhṭanni khan National Food Security Act hi a tlangzarh a ni.

Chief Minister chuan, "NFSA chu district zawng zawngah kalpui turin chak taka hmalak a ni" a ti.

State sorkar leh sorkar laipuite chuan buhfai phurh man hi an intum sem dawn a, mipui te hnenah man tlawm zawkin pek chhuah a ni ang a ti. Zeliang chuan, state sorkarin buhfai lakluh kawngah harsatna a tawk tih sawiin, kum tin transportaion atan hian vaibelchhe 12 a luangral ziah a ni a ti.

An harsatna chinfel a nih theih nan hian June 2014 khat state sorkar chuan sorkar laipuiah ngenna a thlen a, tlang rama awm state-te tan 'transport subsidy' siam sak turin ngen a ni a ti a, transportation-ah hian state sorkar leh sorkar laipui chuan 50:50-in an inchawisem tih a sawi. He mi hnu hian state Food & Civil Supplies (F&CS) department chuan an harsatn chu sorkar laipuiah thlen lehin an harsatna chu lo hriatthiampuiin, state sorkar chuan 25% chian a tum a ni Zeliang chuan a ti.

Minister in-charge of F&CS Zeliang chuan, State Food Commission leh vigilance committee te din turin hma lak mek a ni a ti a, infrastructure heng godown, storage, power back up leh internet connection te neih turin hma a la mek tih a sawi bawk.

Director of Food & Civil Supplies, Alun Hangsing chuan NFSA 2013 sawifiahna leh mipuite hriat tur pawimawhte a tarlang a, APL leh BPL Priority Household (PHH)-ah dah an ni a ti.

National Food Security Act hian an state mipui 79.83 % a huam thei dawn a, thingtlang mipui 61.98% te chu NFSA hi an chhawr thei dawn a ni a ti.

PPH-ah chhungkaw 2,37,434 an awm dawn a, chhungkhaw 44,464-a hmeichhia PHH ration card nei 11, 93,922 ten an chhawr thei bawk ang.