AP-ah Textile Park din a ni dawn

Sorkar laipui chuan Arunachal Pradesh-ah textile park din a remti. Thawhṭanni khan Union Textile Minister Santosh Kumar Gangwar chuan AP Deputy Chief Minister Kameng Dolo hnenah park din remtih a nih thu hi a hrilh niin sorkar official chuan a tarlang.

Union Textile Minister Santosh Kumar Gangwar hian thla thar khian AP hi a tlawh dawn a, garment manufacturing unit Pasighat East Siang district-ah a hawng dawn a ni. Gangwar hian state sorkar chu textile park din a nih theih nan Ministry-ah Detailed Project Peport (DPR) thehlut turin thurawn a lo pe tawh.

Union Minister hian an cham chhung hian developmental package hrang hrang a puan rin a ni a, chung zingah chuan textile leh handloom sector lama hmalakna tur te a tel ngei rin a ni. Textile leh Handicrafts chu mi rethei leh khawsak harsa zawk ten an
ṭangkaipui theih tura beisei a nih avangin Gangwar chuan a ngaihpawimawh thu a sawi.

Hmarchhakah hian Weaver Service Centre hi Guwahati-ah din a ni tawh a, Manipur leh Nagaland tean an nei ve tawh bawk. State deputy chief minister chuan Gangwar hnenah hian ‘Make in India’ programme hnuia hmasawnna an state-in an chan thei tur te a sawipui a, Mau chu suma chan tir kawngah Sweden company te nen hma an lak mek thu a hrilh a, technical advisor Pratap Goswami chuan he project hi a kalpui mek thu a hrilh bawk.

Gangwar chuan ministry-in North Eastern Textile Promotion Schemes second installment pe chhuak leh tura ruahmanna a siam mek thu sawiin, textile tourism pawh Poma-ah din tuma ruahmanna siam mek a nih thu state deputy chief minister hi a hrilh ve bawk.