Delhi-a Hospital 32 ten NCR ngenna pawm Hmarchhak mite tan inenkawlna sensoah ngaih hnathiamna pek an ni dawn

Delhi, IGP Robin Hibu, Nodal Officer for North East People chuan Thawhṭanni khan, hmarchhak mipuite tana thu lawmawm a puang a, Delhi chhunga Hospital 32 zetah hmarchhak mipuite tan National Capital Region (NCR) chuan damlo inenkawlna kawngah hriatthiamna sang tak a pek tur thu a puang.

Hibu chuan, Hospital 32 zetah hian hmarchhak mite buaipui turin Nodal officer dah an ni dawn a, anni hi engtik lai pawha biak pawh theih an ni ang. Hospital hrang hrang te hian hmarchhak mite tan hian an inenkawlna senso 15-30% thlenga ngaihnathiamna pek an remti a ni. Northeast Support Centre & Helpline General Secre-tary Alana Golmei chuan, Delhi-ah hian hmarchhak mi nuai 10 chuang eizawnna leh thil dang avangin an khawsa mek a, he ruahmanna hi khawsak harsa tak tak leh berh ve tak tak te an nih hlawm avangin an ṭangkaipui hle tura ngaih a ni a ti. Nimahsela Delhi-a sorkar enkawl Hospital te hian hmanrua an nei ṭha tawk loin, hnathawktu an indaih lo hle a, hei hian emergency leh thil ṭhenkhatah te harsatna a siam theih thu Alana chuan a sawi bawk.

IGP Robin Hibu chuan, hmarchhak mipuite inhrilh hriat kawngah ṭan kan lak a ngai dawn a, ṭangkai taka hman a nih theih nan kan za vaiin mawhphurhna kan nei a ni. A bikin ṭhalaiten ṭan an lak a ngai zual a, mi harsa zawk leh ṭanpui ngaite buaipuitu kan nih a ṭul chang a awm fo dawn a ni a ti.

Hospital 32 te chu Fortis Hos-pitals, Escort Heart Institute & Research Centre, Aashlok Hospital, Holy Family Hospital Delhi, Medanta Hospital (Gurgoan), B.L. Kapoor Super Speciality Hospital (New Delhi), Sri Ganga Ram Hospital (Delhi), Moolchand Medicity (Delhi), Columbia Asia Hospitals Pvt. Ltd (Gurgoan), Sanjeevani Hospital (Delhi), Kalra Hospital (New Delhi), Paras Hospitals (Gurgoan), Artemis Hospital (Gurgoan), Park Hospital (NCR), Zental Dental Clinic (Delhi), Max, Healthcare (NCR), Asian Institute Of Medical Science (Faridabad) leh Apollo Hospital (New Delhi) te an ni.