Assam : CM pawmpuina tel loin Muslim leh Hindu ten ram inleisak thei dawn lo

Assam chief minister Himanta Biswa Sarma chuan Muslim leh Hindu-te inkara ram hralh turah chief minister pawmpuina lak hmasak a ngai tawh dawn tih a sawi. CM pawmpuina tel lo chuan Hindu leh Muslim-ten ram an inleisak thei tawh dawn lo a ni.

Bharatiya Janata Party (BJP) executive meeting, Srimanta Sankardev Kalakshetra, Guwahati-a neihah sorkar thutlukna siam thar hi Sarma chuan a puang a ni. "Tunhma chuan sakhaw hrang zuitute inkara ram hralh chu zalen takin kalpui a ni ṭhin. Tunah chuan Assam sorkar chuan he kalphung hi tidanglamin Hindu-in Muslim ram a lei dawn emaw Muslim-in Hindu ram a lei dawn emaw a nih chuan Chief Minister pawmpuina neih a ngai tawh ang," a ti. Sarma chuan ram hectare tam tak chu eng sakhaw vuantute emaw lakah an hloh tawh tih sawiin, heng ram hi tual ṭo hnamte hnena pekkir leh an tum tih a sawi bawk.

Assam sorkar chuan 'Love Jihad' khapna dan siam thuai an tum tih CM Sarma chuan a sawi bawk. Dan thar siamna tur bill hi monsoon session neih leh turah put luh an tum a ni. Himanta hian state BJP executive meeting neih zawhah Muslim mipaten inneihna hmanga sakhaw dang zuitute an sakhua vuan tura an inlehtir ṭhin khap an tum thu hi a sawi a ni. Dan thar an siam tur chuan 'Love Jihad' a inhnamhnawhna neite chu dam chhung lung-in tang thlenga hrem theih a ni dawn a ni, a ti. Sarma chuan eptu lamin dodal mah se Assam mipuite dikna chanvo humhim turin hma an la zel dawn tih a sawi.

CM hian Assam chhunga piangte tan chauh sorkar hnaa dil theihna tur dan siam an tum tih meeting-ah hian a sawilang bawk. Congress sorkar laia hna lak dan chu sawiselin Assam police an laknaah 30% chu sakhaw ṭhenkhat tan hauhsak an ni tiin, BJP sorkar chuan sorkar hna laknaah Assam leilung fate a ngai pawimawh dawn a ni, a ti. Assam sorkar chuan hna a la thar leh dawn a, tihfel ngai tlem la awmte chinfel a nih hnuah sorkar hna nuai 1 lak an tum tih a tarlang.