Hmarchhak thar chhuah 'Black Rice' PM-in a fak

Assam, Manipur leh Meghalaya-a thar chhuah, a pianzia leh hmelhmang danglam vanga mit la tak, a rawng dum vanga 'Black Rice' tia vuah chu prime minister Narendra Modi chuan fakin 'chaw ṭha bik' (superfood) a nih thu a sawi.

PM Modi hian International Conference of Agricultural Economists (ICAE) vawi 32-na, New Delhi-a neihah Pathianni khan thu sawiin hmarchhak aṭanga thar chhuah 'Black Rice' hi a fak a ni. PM chuan hriselna atan a ṭhat thu sawiin hemi avang hian a lar chak hle a ni, a ti. "Black Rice hi India rama chaw ṭha bik zinga mi a ni" tiin Modi chuan a fak.

Assam chief minister Himanta Biswa Sarma chuan PM Modi chu Black Rice ṭhatna leh a hlutna a sawi chhuah vangin lawm thu a hrilh a, hmarchhakah tam tak thar chhuah ṭhin a ni tih a sawi ve bawk.

Buhfai-dum (Black Rice) hi zunthlum nei te tan chaw ṭha niin, phenolic a pai tel avangin type 2 diabetes tan ei tam a ṭha tih tarlan a ni. Hemi bakah hian lung lama harsatna neite tan a ṭha a, chaw anga rin chuan cholesterol level a ti hniam thei a, Blood Pressure nei lo turin a pui thei a ni. Hemi bakah hian pum lama harsatna neite tan a ṭha nia tarlan a ni bawk. Hriselna lama ṭhatna hrang hrang a neih avang hian PM pawhin a thusawinaah hian buhfai-dum chu fakin 'superfood' tiin a ko ta a ni. Manipur buhfai-dum, Chakhao chu kum 2020 khan Geographical Indication (GI) tag pek a lo ni tawh a ni.