AR battalion hnih Manipur aṭangin J&K-ah sawn

Assam Rifles (AR) battalion hnih chu Manipur aṭangin Jammu and Kashmir ah sawn an ni. Kuki-Zo hnamte chuan AR sawn chhuah tumna hi dodalna mah se a tahtawlin sawn hna hi kalpui zel a ni.

Manipur aṭanga AR sawn an nih chhan hi J&K-a helpawl chetna chhanglet tura an duh vang nia tarlan a ni. Central Reserve Police Force (CRPF) chuan Manipur-a AR hmun ruak hi an luah dawn a, venhim hna thawk turin AR an thlak ang. Hetih rual hian Manipur aṭangin AR battalion zawng zawng sawn chhuah an ni lo a, state chhunga la awmte chuan helpawl beih leh ramri venghim hna an la thawk chhunzawm ang.

AR sawn chhuah tumna hi kar liam ta Inrinni khan Kuki-Zo hnamte chuan duh lohna an lantir a, AR-te chu tualchhung buainaa hleih nei loa venhim hna thawktu an ni tih sawiin buaina inṭan tirh lam khan Meitei leh Kuki-te chu hmun him lama thiar chhuaktu an nih thute an sawi. Hetih lai hian Meitei pawl, Coordinating Committee on Manipur Integrity (COCOMI) chuan AR chu buaina an neih mekah ṭan lam neiah an puh thung. Assam Rifles chuan poppy chingtute leh ramria dan phal loha sumdawngte lam an ṭan avangin Manipur buaina chu an belh chhah niin COCOMI chuan an sawi ve thung.