Arunachal hi India ram a ni : External Affairs Ministry

Prime Minister Na­rendra Modi-a'n Aru­nachal Pradesh a tlawh avanga China-in a lung­awi loh thu a auchhuahpui hnuah sor­kar laipui chu a ṭawng­chhuak ve ta a, Arunachal Pradesh chu India ram a nih thu leh ṭhenhran theih a nih loh thu a tarlang.

External Affairs Mi­nistry thupuangtu Syed Akbaruddin chuan, "Aru­nachal ram chu India ram a ni a, India aṭanga ṭhenhran theih loh a ni. Arunachal mipuite chu India khua leh tui an ni a, India ram hruaitute'n India state dang an tlawh ṭhin angin Arunachal Pradesh pawh an tlawh ṭhin," a ti.

Prime Minister Modi-a'n Arunachal Pradesh a tlawh vanga China-in a dodalna thu a puanchhuah chungchangah India-in China chu a chhanglet dawn em tia Facebook-a zawhna leh chhanna hun an buatsaiha zawhna lut chu External Affairs Ministry thupuangtu chuan chhangin Arunachal Pradesh chu India ram a ni, a ti.

Modi-a'n February 20-a Arunachal Pradesh statehood day lawmna a hmanpui chu China hian a dodal thu a tlangzarh nghal a, India chu ram inchuh thubuai chinfelna atana inbiakna kalpui mekah boruak tichhetu ni lo tura an duh thu an tarlang. China hian Arunachal hmar lam ram chu Tibet Autonomous Region tiin a chuh a, hei hi India-in a pawm lo.

Facebook-a zawhna leh chhanna hun minit 45 chhung an hmanah External Affairs Ministry chuan zawhna 1,300 chuang a dawng a, Akbaruddin hian zawhna 20 vel a chhang.