Manipur BJP thuchhuak UNC-in dodal

Bharatiya Janata Party (BJP) Manipur Pradesh president Th Chaoba-a'n Manipur-ah sorkarna an chan chuan Sadar Hills chu district puitlinga hlankai a ni ang tia a sawi chu United Naga Council (UNC) chuan chhangletin, an lungawi loh thu an tarlang.

UNC information and publicity wing chuan, Manipur BJP president Th Chaoba-a'n Senapati district, Henbung-a February 19-a 'one-day awareness-cum-mass enrolment programme' an buatsaih ṭuma Sardar Hills chungchang a sawi hi mipuite zah lohna lian tak a ni," tiin an thu­chhuahah an tarlang a, state BJP president-in hetiang thu a sawi avanga harsatna a thleng a nih chuan a mawhphurtu a nih tur thu an tarlang bawk.

"Sardar Hills chung­changa Naga pawl hrang hrangte leh Manipur sorkarin memorandums of understanding (MoU) pali- December 14, 1981, November 10, 1992, September 27, 1996 leh June 23, 1998-a an lo ziah tawh chu Chaoba leh a party chuan an theihnghilh tur a ni lo a, hemi chungchangah hian sorkar laipui pawh a inrawlh a ni tih hi hre rawh se," tiin UNC thuchhuak chuan a tarlang.

UNC chuan Sadar Hills chungchang chu political party emaw mimal tu mahin politics thila inbeihna emaw hamṭhat um nana hman an remtih loh thu an tarlang bawk.

Sadar Hill hi Manipur Senapati district-a tlang­ram bial niin Autonomous District Council awmna ni a, Naga hnam peng hrang hrangte chen tamna a ni.