CBSE-in spl committee din turin Manipur a hriattir
Central Board of Secondary Education (CBSE) chuan March thlaa pawl 10 leh 12 board exam neih turah dik leh felfai taka exam neih a nih theih nan a endik tur, special monitoring committee din turin Manipur sorkar a hriattir.
CBSE hnuaia pawl 10 leh 12 exam hi March 2-ah ṭan a ni ang.
Board-in record hluite a ennawnah Manipur-a CBSE exam-ah dik lo taka thiltih a tam hle tih a hmuchhuak tiin CBSE official chuan a sawi a, dik leh felfai taka exam neih a nih theih nan monitoring committee chuan ruahmanna a siam dawn a ni, a ti.
"Monitoring committee-ah hian CBSE-affiliated school-a senior principal te chu member-ah ruat an ni ang a, anni bakah hian state sorkar aiawhte pawh ruat an ni ang," tiin CBSE Guwahati Zone-a regional officer Sanjib Das chuan a sawi.
"Exam-naa entawn leh inbumna tihtlem nan a endik turin colleges and university hrang hranga zirtirtute chu observer-ah ruat an ni bawk ang a, anni hian exam centre te chu tlawhin an enfiah ṭhin ang" tiin a sawi bawk.
Hmarchhak bialah hian CBSE hnuaia pawl 10 leh 12 exam centre 312 hawn a ni a, state tina scool education board-te chu exam centre te vil tura hriattir an ni bawk a, state education board awm lohna Sikkim leh Arunachal Pradesh-ah chuan state education department-a official te chu observer tura ruat an ni.