NPP-in GHADC inthlan neih thuai an phut

Parliament budget session neih mekah sor­kar laipuiin India danpui, Sixth Schedule siamṭhat tumna a neih loh avang­in Meghalaya-a tualṭo party, National People’s Party (NPP) chuan Garo Hills Autonomous District Council (GHADC) inthlan neih thuai an duh thu an tarlang.

Garo Hills-a hel pawl, nikum September 24-a sorkar laipui leh state sorkar nena remna thu­thlung ziak tawh, Achik National Volunteers’ Council (ANVC) chuan GHADC-a member tihpun an phut a, hei hi Sixth Schedule siamṭhat a nih loh chuan tihpuitlin theih a ni lo.

Congress party kaihhruai, Meghalaya sorkar chuan kumin January 6 khan GHADC term hi a vawi li-na atan a pawtsei a, ANVC thilphut chu tihpuitlin a nih hnuah inthlanna neih a rel a ni.

NPP thupuangtu James K Sangma chuan, "Chief Minister Mukul Sangma chuan GHADC-a Congress kaihhruai sorkar term chu pawtseiin mipuite bum a tum a ni. Tuna Parliament budget session neih mek­ah sorkar laipui chuan Sixth Schedule siamṭhat tumna a nei lo a ni," a ti.

"Parliament session neih mekah India danpui, Sixth Schedule siamṭhat tumna a awm lo a, session chu vang chuan tun aṭanga thla ruk chhung chu Sixth Schedule siamṭhat a ni dawn lo. Hei vang hian NPP chuan GHADC inthlanna hi a rang lama neih a phut a ni," tiin James K Sangma chuan a sawi.