Assam Governor-in samak humhalh nan hma la

Assam Govenor Padmanabha Balakrishna Acharya chuan sa pel ru ṭhinte lak aṭanga samak humhalh nan leh samak humhalh a ṭul zia mipuite hnena puandarhna atana ruahmanna siam tumin mithiamte leh khawtlanga tlawmngai pawl hrang hrangte meeting a neihpui.

Meeting-a tel mithiam te leh tlawmngai pawl hruaitute chuan samak humhim nan theihtawp chhuah turin mipuite an ngen.

Meeting-ah hian ramsate veng tur, mi 1200 awmna Special Protection Force din tur chungchangte sawi ho a ni a, ramsate him nan Protection Force te chu theihtawp chhuaha thawhpui a pawimawh thu an sawi bawk.

"Wildlife sanctuary chhehvela cheng mipuite chu sa pel ru ṭhinte ven nan an pawimawh a, sorkar chuan heng mite leh Protection Force te hi hmanraw ṭha a pek a ṭul a ni. Sorkar chuan mipuite hi thawhpuiah a siam a ngai a, hei hian nasa takin ramsa humhalh kawngah rah ṭha a chhuah dawn a ni," tiin meeting chuan a rel.

Chi mang hlauhawma awm, Assam-a samak ki khat neite hi sa pel ru ṭhinte lakah an him lo hle a, nikum khan Assam-a sanctuary hrang hrangah samak 20 chuang kahhlum a ni. Kumin January aṭangin Kaziranga National Park-ah samak pathum kahhlum a ni tawh a, Nagaon district-a pakhat kahhlum nen kuminah samak pali chu sa pel ṭhinte kutah an thi tawh a ni.