Manipur budget session tan

Manipur assembly budget session chu Nilaini khan ṭan a ni a, Governor KK Paul-a'n thuchah a sawi.

Governor Paul chuan sorkar hlawhtlinna hrang hrang tarlangin, kum kalta khan Manipur-ah infrastructure hma­sawnna tam tak a thlen thu a sawi a, kum kal mekah state sorkar chuan plan sumah cheng vaibelchhe 3,200 dawn a neih thu leh heng zingah hian Special Plan Assistance (SPA) vaibelchhe 450 leh SCA vaibelchhe 800 a tel thu a sawi.

Reserve Bank of India chuan Manipur-ah regional office hawn a tum thu sawiin, hemi atan hian state sorkar chuan ram a ngaihtuahsak tawh thu a sawi bawk.

Governor chuan sor­kar laipui thupek angin Manipur-ah April thla aṭangin National Food Security Act kalpui a nih tur thu a sawi a, Food Security hi mi 24.84-in a hamṭhatna an hmuh tur thu a sawi bawk.

Session ṭan hi hian Finance portfolio changtu, Chief Minister Ibobi Singh-a'n kum 2015-16 chhung atana “provisional budget es­timate” cheng vai­bel­chhe 10702.4 a pharh nghal.

Ibobi chuan kum 2015-16 budget puitling chu peihfel hman a nih loh vang leh sorkar laipui aṭanga non-plan sum Finance Commission-in a ruahmansak zat hriat a nih loh avangin financial year thara sorkarin a mawhphurhna a hlen theih nan thla li chhung hman tur Vote on Account-a pawmsak turin House a ngen.

"Kum 2015-16 hi 14th Finance Commission award period hmasa ber a ni dawn a, Commission chuan sorkar laipuiah rawtna a thlen tawh a, a pawmpuina a nghak mek a ni," a ti.

Chief Minister Ibobi chuan kum 2015-16 atana state plan sum aṭanga expenditure turah cheng vaibelchhe 4933.10 a dah lailawk a, Centrally Sponsored Scheme (CSS) hnuaiah vaibelchhe 251.85 leh Non-Plan ah vaibelchhe 5517.46 dah a rawt bawk.