Sorkarin hel pawlte inbiakna thar neihpui dawn tawh lo

Sorkar laipui chuan hmarchhak biala hel pawl, inkahhai thuthlung a ziahpui mekte nena remna zawnga inbiakna a kalpui mek chu a rang lama chinfel thuai a nih tur thu sawiin, pawl dangte nena inbiakna thar neih erawh a tum rih loh thu a tarlang.

Union Ministry of Home Affairs (MHA) official chuan he thu hi sawiin, tharum thawhna bansana an harsatnate an chinfel theih nan sorkar laipui chuan hel pawlte chu hun remchang tam tak a siamsak tawh a, hei vang hian inbiakna neihpui hi a phur tawh lo a ni, a ti.

Official chuan Paresh Baruah-a kaihhruai United Liberation Front of Asom (Independent) te chu sorkar laipuiin inbiakna kawng a kharsak thu a sawi bawk a, Baruah chuan inremna a awm theihna atana sorkar hmalakna chu a ṭha zawngin hman a tum ngai lo a ni, a ti.

Union Home Minister Rajnath Singh chuan nikum December 23-a Songbijit-a kaihhruai National Democratic Front of Boroland (NDFB) hel pawlte pawikhawihna avanga mi 70-in an thih phah hnu khan Songbijit-a pawlte hi remna zawnga inbiakna neihpui a tum loh thu a lo sawi tawh a ni.

MHA official chuan hel pawlte nena inbiakna kal mek chinfel nan hun bithliah an siam thu a sawi bawk a, inbiakna an neih tawhte chuan rah ṭha a chhuah a beisei thu leh remna tluantling a awm thuai a beisei thu a sawi. Hetihlai hian official chuan hun bithliah an siam dan erawh a sawi lang duh lo thung.