NE Industrial Policy ṭhiah a ni lo: Sorkar laipui

Sorkar laipui chuan Department of Industrial Policy and Promotion (DIPP)-in hmarchhak biala industry policy a kalpui, North East Investment and Industrial Promotion Policy (NEIIPP) chu ṭhiah a nih loh thu a tarlang.

NEIIPP hnuaia financial year 2014-2015 atana sum ruahman chu hman zawh tawh a nih avangin registration thar tihtawp a ni tiin Union Minister of State for DoNER Dr Jitendra Singh chuan Lok Sabha-a zawhna a chhanah a sawi.

Union Ministry of Commerce and Industry chuan nikum November khan thuchhuah siamin, NEIIPP hnuaia scheme thar kalpui turte chu tihtawp lailawk a nih thu leh District Industries Center (DIC) tina Gene­ral manager te chu December 1 aṭanga scheme thar kalpui turah registration ti tawh lo turin a hriattir a ni.

NEIIPP hi hmarchhak state pariat tan kum 2007-ah kalpui ṭan a ni a, kum 10 chhung, 2017 thleng kalpui tura ruahman a ni.

Policy hnuaiah hian hmarchhak biala industry tichangtlunna atan investor-te chu ṭanpuina sum pek an ni a, industry-te tan excise duty leh income tax awltir an nih bakah industry din ṭan nan subsidy hrang hrang pek a ni bawk.