Assam Congress-in assembly inthlan neih thuai an duh

Nakkuma state assembly inthlan nei tur Assam-a Congress party chuan sorkar laipuia BJP sorkarin hun khirh a hmachhawn lai remchanga lain assembly ṭhiaha inthlan neih thuai an duh thu an tarlang.

Assam Chief Mi­nis­­ter Tarun Gogoi leh West Bengal CM Mamata Banerjee te'n tun hnaia Bihar Chief Minister Nitish Kumar lakluhna inkhawm chhim tura Bihar an tlawh ṭum­in Patna-ah meeting pawimawh tak an neih thu Assam Congress party hruaitu chuan a sawi a, meeting-ah hian state pathum CM te bakah AICC general secretary in-charge CP Joshi, Assam PCC president Anjan Dutta leh Janata Dal (U) party hruaitute an tel thu a sawi.

Meeting-ah hian Assam leh West Bengal assembly inthlan hun sawn hma chungchang an sawi ho tih a sawi bawk a, kumin kumtawp lama assembly inthlan nei tur Bihar-a inthlanna neih rualin Assam leh West Bengal assembly inthlan pawh neih ve duhna a awm thu a sawi bawk.

Assembly inthlan hun sawm hma duhna hi Assam Congress party chuan a dodal loh thu leh party thuneitute'n a ṭhat leh ṭhat lohnate an ngaihtuah mek tiin Assam Congress hruaitu pakhat chuan a sawi.

TMC hotu, West Bengal Chief Minister Mamata pawhin inthlan hun sawn hma tura rawtna hi a hnial loh a sawi bawk a, Assam-a Congress party-in BJP hneh an duh ang bawkin BJP hneh a duh a ni, a ti.

Congress party hrauitu chuan, "India ram pumah BJP tan hun thim a inṭan chho mek a, hei vang hian kan tih theih awm chhun chu an chak loh lai bera BJP beih a ni," a ti.