Meghalaya-in Bangladesh ramriah curfew a puang

Meghalaya chuan a ṭhenawm ram, Bangladesh buaina avanga state chhunga himna a derthawn loh nan Bangladesh nena an ramriah tiam chin awm loin zan curfew an puang. Deputy chief minister, Prestone Tynsong hoa mi pawimawh ṭhukhawm chuan Thawhṭanni khan zan lama ramri khar tura thutlukna hi an siam a ni.

Bangladesh leh Meghalaya hian kilometer 443-a thui ramri an inṭawm a, Bangladesh tualchhung buaina a sosan zel avangin state mipuite him nan leh India ram tana ṭha zawk tur nia ngaiin ramri a curfew puang tur hian thu an titlu ta a ni. Thawhṭannia ṭhutkhawmah hian deputy CM bakah Chief Secretary, Director General of Police (DGP) leh BSF inspector general te an tel. Deputy CM Prestone Tynsong chuan Thawhṭanni zan aṭang khan curfew hi neih ṭan a ni nghal tih sawiin, Banglaesh buainain ziaawm lam a pan hma loh chu curfew puan chhunzawm a ni ang, a ti.

Curfew hi international pillar aṭanga India ram chin, meter 200 huam chhungah puan niin tlai dar 6 aṭanga zing dar 6 thleng a awh ṭhin ang. Tynsong chuan hemi hunchhung hian mipuite chu ṭha taka sorkar thlawp turin a ngen a, a bikin ramri depa chengte chuan an hriathiam a ngai tih a sawi. Mipuite thlawpna a ngen bakah ramri venpui turin a sawm nghal a ni. Sorkar laipui chuan ramria venhimna tichak zual turin Border Security Force (BSF) battallion pakua ramriah a dah luh belh tih sawiin a ṭul a nih chuan dah belh an ni dawn tih Tynsong chuan a sawi. Meghalaya leh India zirlai, Bangladesh-a awmte chu him takin a hruai haw a tiam bawk.

Meghalaya ang hian hmarchhak state zinga Bangladesh nena ramri inṭawmte chuan ramriah venhimna uluk zawkin an kalpui ve nghal a ni. Tripura chuan km 856-a thui Bangladesh ramriah venhimna an tih khauh belh a, sipaite pawh inralring tura hriattir an nih thu BSF chuan a tarlang. Tripura leh Bangladesh inrina hi dan loa ramri kan ṭhin ten India ram luh ruk nana an kalkawng ber pakhat niin, ramri hi hung vek a nih loh avangin luh ruk a awl hle. Hei vang hian BSF chuan ramri hi uluk lehzualin an thlithlai a, sipai pawh dah luh belh an ni. BSF hian Bangladesh Border Guard-te nen thawh hona ṭha tak an neih thu leh tun dinhmunah pawh an ṭanrual thu an tarlang a ni. Integrated Check Post (ICP)-a hmalak dan turah erawh thuthar an dawng lo thung.

Assam sorkar pawhin Bangladesh hrula awm district-te chu inralring turin hriattirna a ti chhuak. Assam district pali Karimganj, Cachar, Dhubri leh South Salmara-Mankachar te chuan Bangladesh nen hian 267.5 km a thui ramri an inṭawm a, heng district chhunga Superintendent of Police leh District Commissioner-te chu anmahni ngeiin ramri dinhmun thlithlai turin sorkar chuan a hriattir.