Sikkim CM-in state budget thar a pharh

Sikkim chief minister Prem Singh Tamang chuan Thawhṭanni khan state budget 2024-25 pharhin zirna, hriselna leh hmasawnna ruhrel din ngaih pawimawh a nih thu a sawi. PS Tamang hian a zawna budget ṭum ruk a pharhna a ni a, kum 2018-19 budget aṭanga tehin kumin budget punna hi 109% a tling a ni.

Sikkim budget tharah hian sector hrang hrang atana sum hman dan tur ruahman a nih dan chu education tan 13% dah niin, land revenue-ah 9%, rural development-ah 8%, health-ah 6% leh social security and development-ah 5% dah a ni. Tourism, electricity leh kawngpui siam leh enkawlna atan 4% ṭheuh dah a ni bawk.

State-in chhiah aṭanga sum a lakluh a pun theih nan hmalakna neih a ni dawn tih Chief Minister Tamang chuan sawiin, hemi a hlawhtlin theih nan ramri inkalpawhna tihchangtlun, GST database thuam chhak leh online excise transaction tih theih nan e-Akbari project hman tum a ni tih a sawi.

Sikkim budget session neih mekah hian lehkha puan hman a ni lo a, lehkha pawimawh leh Governor speech an chhiar duh a nih pawhin Legislator-te chuan tablet an hmang a ni. Sikkim CM leh finance minister ni bawk, PS Tamang chuan sorkar kum 2024-25 atana sum ruahman chu Rs vbc 14,490.67 niin sum hman ral tur aiin sum lakluh a tam dawn (surplus budget) niin a tarlang. Sikkim GSDP chu Rs vbc 50,000 aia tamah a pung chho tura beisei niin hmasawnna hna thawh nana sum dah, capital expenditure chu Rs vbc 3,752.90 a ni.