Assam : Guwahati chhungah tuilian vangin harsatna thleng

Assam khawpui, Guwahati chhungah ruah sur nasa vanga tuilian thleng chuan mipuite harsatna a siam mek a, hmun tam takah tui tling a tam vangin khawpui chhunga veivah a harsat bakah zirna-inte pawh khar an ni.

Guwahati-ah hian Thawhṭanni khan ruah nasa taka surin, tui a lian a. Heihi khuarel ken tel ni loin mihring siam chawp a ni tih tarlan a ni. Khawpui chhunga kawr mumal lo avangin kawngpuiah tui tam tak a tling a, mipui veivahna kawngah harsatna a thleng nasa hle. Office bang, sikul naupang haw leh ambulance-te chuan tuilian vang hian an kal duhna hmun an pan thei lo. Khawpui chhung hmun tam takah current a awm loh vangin harsatna an tawk nia tarlan a ni bawk.

Assam sorkar chuan tuilian vang hian Guwahati khawpui chhunga zirna-in zawng zawng tan nimin khan chawlh a puang. District Commissioner chuan thuchhuah siamin Guwahati Municipal Corporation (GMC) huam chhunga sorkar leh private school zawng zawng tan chawlh hi a puang a, mipuite him zawk nana tih a ni. Regional Meteorological Centre chuan Guwahati-ah hian ruah a la sur chhunzawm dawn nia a tarlan vangin tuilian vanga harsatna an tawh mek hian ziaawm lam a la pan mai a rinawm loh a ni.