NE state khawpuite'n 2020-ah rel service nei vek dawn Assam pawl hrang hrangin Railway Budget an sawisel

Northeast Frontier Railway (NFR) general manager RS Virdi chuan kum 2020-ah hmarchhak state khawpuite chu rela kalpawh theih vek a beisei thu a sawi.

Assam International Trade and Industrial Fair (AITIF) kharna pual­in, February 25 khan Jorhat-ah ‘Railways, Infrastruc­ture and Construction: Mobilising the North East – Railways as an Agent of Change’ thupui hmanga sawi hona neih a ni a, hetah hian Virdi chuan thu sawiin, NFR project lian tham ṭhahnem tak chu hmarchhak biala kalpui a nih thu a sawi.

Hmarchhak biala project lian tham 34 an kalpui mek chu cheng vaibelchhe 53,000 hu a ni, a ti.

Hetihlai hian Central-a NDA sorkarin Ningania Railway Budget 2015 a pharh chu hmarchhak mite tan lawmna tur a awm loh thu pawl hrang hrang te'n an tarlang.

All Assam Students’ Union (AASU) chuan Railway budget hian hmarchhak mite tan thil lawmawm a thlen loh thu tarlangin, an lungawi lohna lantir nan railway budget copy an hal. Assam Congress party leh tualṭo party, Asom Gana Parishad (AGP) pawhin railway budget chu sawisel nghalin, Prime Minister Narendra Modi-a sorkarin hmarchhak mite a phatsanna a ni, an ti.

AASU adviser Samujjal Bhattacharjya chuan, "Assam leh hmarchhak mite chuan central-ah sorkar thar a din tawh avangin Railway budget-ah pawh thil thar kan beisei a, mahse NDA sorkar chuan kan beiseina hi a tibo vek a ni. Railway budget aṭangin Assam-in eng mah a chang lo tur hi a beidawnthlak a ni," a ti.

Hetihlai hian railway project kalpui mekte a rang lama chinfel a nih tur thu Railway Minister Suresh Prabhu-a'n a puang chu AASU chuan lawmawm a tih thu a tarlang bawk.

Assam Congress president Anjan Dutta chuan Railway budget chu BJP sorkarin hmar­chhak mite a phatsanna a ni, a ti. "Assam-in state dangte anga railway infrastructure ṭha a lo beisei ṭhin chu a thamral nghal vek a, NDA sorkar hnuaiah Assam mipuite'n 'achhe din' (good days) kan beisei ngam dawn lo a ni," tiin Dutta chuan a sawi bawk.

AGP general secretary Ramendra Narayan Kalita pawhin Railway budget chu sawiselin, hmarchhak bial leh Assam tan thil thar engmah a awm lo, a ti. Railways-a hna lak dan kalphung thar siam tumna hian tualchhung mite chanvo nasa takin a pawhpen sak dawn a ni, a ti.

KMSS president Akhil Gogoi chuan Railway budget chu mipuite chanvo awm lohna budget a ni, tiin sawifiah leh hriat chian har a tih thu a sawi.

Hetihlai hian Assam unit BJP hotu Hiten Goswami chuan Railway budget chu mipuite budget a nih thu sawiin, rel chuan man tihsan a ni lo, a ti a, India zalen hnua a vawi khatna atan Indian Railways chu bung thar keupui tum a ni, a ti.