Mukul-a'n state revenue mamawh aia tam lakluh beisei

Chief Minister Mu­kul Sangma chuan Meghalaya chu revenue-deficit nei state-te list aṭanga paihbo a tum thu sawiin, tun aṭanga kum nga-ah chuan state sum mamawh aia tam revenue an lakluh theih a beisei thu a sawi.

Chief Minister Mukul chuan India ram state zingah state 11 chauh chu revenue-deficit nei lo list-ah an awm thu a sawi a, Meghalaya chu state ṭhanglai a nih thu leh state sum indaih lohna phuhruk nan sorkar laipui ṭanpuina dil ngai lo tura sorkarin Meghalaya dinhmun siamṭhat a tum thu a sawi.

"Tun aṭanga kum 6-7 ah chuan Meghalaya chu amah kut leh ke ngeia a din theih nan ruahmanna kan kalpui mek a, India ram hmasawnna atana tha kan thawh ve theih tawh kan beisei a ni," a ti.

Mukul chuan 13th Finance Commission hnuai­ah Meghalaya-in amahah a sum thawh­chhuah chu vaibelchhe 14,160 a ni a, hetihlai hian Mizoram-in revenue vaibelchhe 3636 chauh ama thawhchhuah aṭangin a lalut a, Mani-pur pawhin vaibelchhe 6135 chauh a thawkchhuak a ni, a ti.

Meghalaya Chief Mi­nister chuan 13th Fi­nance Commission hnuaiah Meghalaya-in sum a thawhchhuah, Gross State Domestic Product (GSDP) aṭanga leiba a neih zat chu 26.69 % a ni a, GSDP aṭanga Manipur leiba neih zat chu 52.1 % a nih thu leh GSDP aṭanga chhuta Mizoram leiba neih zat chu 59.6 % a nih thu a sawi bawk.

14th Finance Commi­ssion-ah Meghalaya-in vaibelchhe 50,000 ṭan­puina a dil thu sawiin, vaibel-chhe 27,270 vel an dawn theih a beisei thu a sawi.