Manipur-ah Foreign tourist an pung

Manipur Governor KK Paul chuan state budget session-a thu a sawiah Nilaini khan Manipur chu hmarchhak state zingah kum 2013-14 chhunga foreign tourist punna sang ber a ni, a ti.

"Ramchhung leh rampawn aṭanga Manipur-a khualzin lut hi an tam hle a, kum 2013-14 chhungin Manipur-ah khualzin 1,45,647 an lut a, heng zinga 1,43,059 hi ramchhung mi niin, mi 2,588 chu foreign mi an ni," a ti.

Governor Paul chuan Manipur tourism kaltlanga hna siam nan leh investment tam zawk siamna atan Manipur Tourism Policy, 2014 chu kum 2014, June 11 khan hman ṭan a ni tih a sawi.

Kum 2011, January-a Manipur-a Protected Area Permit (PAP) thlahdul a nih hnuah ramchhung leh rampawn aṭangin khualzin tam zawkin Manipur an tlawh tiin Manipur Tourism depart­ment record chuan a tarlang.

Tourism department chhinchhiah danin PAP thlahdul hnu kum 2012-13-ah foreign tourist 768-in Manipur an tlawh a, kum 2011-2012 ah foreign tourist 602-in Manipur an tlawh bawk. Kum 2010-11-ah foreign tourist 431-in Manipur an tlawh a, kum 2009-10-ah mi 405 leh kum 2008-09 ah foreign tourist 271-in Manipur an tlawh bawk.

Kum 2008-09 aṭanga 2013-14 thleng Manipur-a ramchhung leh rampawn khualzin lut zat state tourism department-in a chhinchhiah chu 7,72,627 a ni.