Manipur-a CAPF posting titawp rih turin sorkar laipui ngen

Manipur chief minister N. Biren Singh chuan an state-a Covid-19 kai an pun belh zel avangin sorkar laipui hnenah an state-a  Central Armed Police Forces (CAPF) transfer leh posting chu kalpui chhunzawm tawh rih lo turin a ngen.

CM Singh hian union home ministry hnenah ngenna hi thlenin, hri lengin ziaawm lam a pan hma chuan an state-a CAPF  dah luh leh transfer chu chawl rih tura an duh thu a sawi. Security force mi leh sa, an chawlh hmang zoa Manipur-a post leh duty tura lut tam tak chu Covid-19 an kai tih hmuh chhuah an ni tawh a ni. CAPR zingah coronavirus kai hmuh chhuah 1,431 an awm tawh.

Nilaini khan CM hoin CAPF high-ranking official meeting  neih a ni a, state chhung hri leng dinhmunte an thlir a, hma lak zel dan turte pawh an sawiho a ni. Manipur-ah hian hri kai hmuh chhuah tawh mi 5,585 an awm tawh a, an zinga 3,829 chu enkawl dam ni tawhin hri kai mek mi 1,731 an awm. Hri kai zinga mi 25 in an thihpui tawh bawk. 

Manipur sorkar chuan  state dang aṭanga hawte chungchanga kaihhruaina a siam thar chu Nilaini khan a tichhuak. Hmun dang aṭanga haw, ni 14 chhung inkhung hrang ngei ngei tur tihna chu siamṭhain, haw te hi Covid-19 test an neih hnua an negative a nih chuan ni 14 an inkhung hran a ngai tawh lo ang. 

Chief secretary Dr Rajesh Kumar chuan hemi chungchangah hian thu­chhuah siamin, hmun dang aṭanga hawte hi Manipur an thlenin Covid-19 test neih sak vek an ni ang a, hri kai lo te chu in lamah an haw phalsak zel an ni a, a ti. Hemi rual hian hri darh tur laka invenna atana mask hman, kut sil leh social distancing dan te zawm ṭha tura hriattir zel an ni dawn a ni, a ti.