Hmarchhak-ah AFSPA hnuaia 'distubed areas' puan a tlem zel : MoS Home

Sorkar laipuia minister of state for home affairs, Nityanand Rai chuan hmarchhak huam chhungah Armed Forces (Special Powers) Act, 1958 hnuaia ram buai, distrubed areas-a puan hmunte chuan kiam lam a pan zel tih a sawi.

Nityanand Rai hian Lok Sabha-ah zawhna chhangin kum 2014 nena khaihkhinin kum 2023 khan hmarchhak-a helpawl chetna chu 71 per cent in a tlahniam tih a sawi a, security force thihna chu 60 per cent in a tlahniam tih a sawi bawk. Hemi bakah hian civil mite thihna pawh 82 per cent in a hniam tawh zawk tih Rai chuan a sawi.

Hmarchhak state hrang hrang zingah Tripura (2015) leh Meghalaya (2018) ah AFSPA dan hnuaia distrubed area-a puan a awm tawh lo a, Assam-ah pawh district pali tih lohah chuan AFSPA dan hi hlih a ni tawh bawk. Arunachal Pradesh-a police station pathum huam chhungah he dan hi hman a la ni.

Chi leh chi inkara buaina vanga state ralmuang lo tak, Manipur-ah AFSPA dan hman hi district pasariha police station 19 huam chhungah hlih a ni tawh. Helpawl tamna hmun, Nagaland-ah pawh he dan hi a tahtawla hlih zel ni mah se helpawl chetna a hluar avangin district pariatah hman mek a la nih bakah district dang pangaa police station 21 huam chhungah AFSPA hi hman a la ni.

Sorkar laipui hian kum 2014 aṭang khan hmarchhaka helna tih reh tumin hma a la a, helpawl hang hrang nen inremna siamin hmarchhak pawh a ralmuang sawt hle. Helpawl chetna tireh tur leh chhan letna atana duan, AFSPA dan hmanna huam chhung pawh zim zelin he dan hi Tripura leh Meghalaya-ah chuan hman a ni tawh lo a ni.