Assam Hindu pawlin Meghalaya nena inkalpawhna danah vau

Mawsynram Dorbar Shnong, Meghalaya-in Hindu sakhaw zuitute Mawjymbuin puka ṭawngṭai an phalsak loh hnuah, Assam-a Hindu pawl pakhat, Kutumba Surakshya Parishad (KSP) chuan he thil thleng avang hian Meghalaya sorkar chu Assam nena inkalpawhna kawngpui dansakah an vau.

Mawjymbuin puk hi Hindu sakhaw zuitute chuan 'Shiva Linga' awmna niah ngaiin he puka ṭawngṭai tur hian an kal ṭhin a, mahse Mawsynram Dorbar Shnong chuan kar liam ta khan he puka ṭawngṭai tum Hindu-te chu an lo dang a, tourism minister chuan he thutlukna hi a thlawp thu a sawi bawk.

KSP chuan Hindu puk tlawh tumte dan an nih chhan sawifiah turin Meghalaya sorkar chu a phut a, an insawifiah lo a nih chuan Assam-ah lungawi lohna lantir niin Meghalaya nena inkalpawhna- Jorabat (Guwahati), Paikan (Goalpara) leh kawngpui dangte chu dan an tum a ni.

KSP president, Satya Ranjan Borah chuan Prime Minister Office (PMO) leh United Nation Secretary General office te chu Hindu-te dan an nih chhan Meghalaya chief minister zawt turin a ngen a ni. Meghalaya sorkar chuan Hindu thla serh, Shravana laiin Hindu ten Mawjymbuin puka an ṭawngṭai theih nan ruahmanna felfai tak siam se an duh tih a sawi bawk.