Nagaland : AYO huaihawtin tih luihnaa chhiah khawn duh lohna lantir

Nagaland-a civil mite laka tih luihnaa chhiah khawn ṭhin leh pawisa pe tura vauna an tawh ṭhin duh lohna lantir nan Thawhlehni khan Kohima-ah mipui an pungkhawm. He hun hi Angami Youth Organisation (AYO) kaihhruaina hnuaia neih a ni.

National Socialist Council of Nagaland- Khango (NSCN-K) hnen aṭanga contractor pakhat, K Rulho-in thaha vauna a dawn hnuah AYO hian tih luihnaa pawisa khawn leh invauna thleng ṭhin duh lohna an lantir a ni. He hunah hian ṭhalai pawl hrang hrang an tel bakah mipui tel an ṭhahnem hle.

Old MLA Hostel bul kawng pengṭhuamah mipui tam tak pungkhawmin chhiah khawn leh mi vau chingte an dem thu an tarlang. Lungawi lo pungkhawmte chuan dan phal loh chetna do tur hian mipuite chu ṭangrual turin an sawm a ni.

AYO president, Kesosul Christopher Ltu chuan Naga mipuite ṭanrual lohna chu Naga Political Groups (NPGs) te chuan remchangah hmangin mipuite vekin an tawrh phah a ni, a ti. Naga hnam tana rorelna hran phut chuan chhiah khawn leh midang thil hneh chhuh a keng tel lo tih a sawi bawk. AYO chu Naga mipuite tan an ding zel dawn a ni, a ti.

Nagaland Governor, La Ganesan hnenah AYO chuan memorandum thehlutin, NSCN-K chu sorkar laipui nen inkahhai puanga inremna nei lai ni mah se contractor pakhat chu thahah an vau tih an tarlang. AYO hian an harsatna chinfel thuai a nih loh chuan tualchhung buaina a sosan phah thei tih an sawi bawk.

Nagaland chhunga helpawlte hian chhiah an khawn leh mi an rikrap titawp se an duh thu leh, inkahhai thuthlung an ziah chu ṭha taka kengkawh turin an duh tih AYO chuan an tarlang. Hemi bakah hian mipuite humhim kawngah ṭan lak thar a ngai tih sawi bawkin, helpawlte chu civil mite bul ni lo, chenna tur hmun hran siamsak turin an duh tih an tarlang a ni.