Assam CM hlui Tarun Gogoi buaipui tur committee din

Assam chief minister hlui leh Congress party hruaitu hlun, Tarun Gogoi chu Covid-19 a kai tih hriat a nih hnuah Gauhati Medical College & Hospital-ah dah luh niin enkawl mek a ni. 

Gogoi hi Thawhlehni khan hri a kai tih hriat a ni a, Nilainiah damdawi-inah dah a ni. Health minister Himanta Biswa Sarma chuan GMCH-a enkawl mek, CM hlui dinhmun thlithlai reng tur hian Dr Jogesh Sarma, GMCH-a Pulmonary Medicine department HOD kaihhruaina hnuaiah committee din nghal a nih thu a sawi a, Gogoi chu dam thuai tura a duhsak thu a sawi bawk. 

Assam-ah hian Nilaini khan Covid-19 kai zinga mi 14 an thi leh a, nikhata hri vanga thi an tam ber ni a ni a, hripui thihpui hi mi 274 an awm tawh a ni. Hri kai hmuh chhuah hi mi  96,771 an tling tawh a, an zinga 74,814 chu enkawl dam an ni tawh. 

Hri kai hmuh tawh zingah hian MLA 16 an tel. An zinga pariat chu BJP MLA niin an thawhpui AGP member pahnih, BPF leh independent MLA pakhat ve ve, Congress MLA pathum leh AIUDF MLA pakhat an tel a ni.