NESO-in hmarchhaka dan loa lutte dang turin PM an ngen

Hmarchhak zirlai pawl hrang hrang intelkhawmna, North East Students' Organisation (NESO) chuan Bangladesh aṭanga hmarchhak huam chhunga dan loa lutte dang turin prime minister Narendra Modi an ngen.

NESO hian Bangladesh raltlante chu hmarchhak huam chhunga humhimna pek an duh loh thu tarlangin, sorkar laipui chuan ramri a ruka kan tum an awm em tih chu ngawrh lehzualin enfiah se an duh tih an sawi bawk. Hmarchhak leh Bangladesh ramri chu uluk taka venhim an phut a ni.

Hmarchhakah ramdang aṭanga lut an tam avangin tualṭo hnamte nen an inkarah buaina a chhuak ṭhin tih NESO chuan an tarlang a, tuna Bangladesh-in tualchhung buaina a tawh mek avang hian India ram rawn luh tum an tam thei a ni tiin, hemi laka hmarchhak venghim tur hian PM chu hma la turin an duh tih an tarlang.

NESO chuan Bangladesh ramah buaina a chhuak a nih chuan hmarchhak chu a tuartu ber a ni ṭhin tih an sawi a, kum 1947-a East Pakistan a pian dawn khan Bengali tam tak chu khatih laia Union Territory, Tripura leh Assam-ahte an lut tih an tarlang. Hemi hnu, kum 1971-a Bangladesh-in zalenna a suallai pawhin hmarchhakah raltlan tam tak lutin, a bikin Assam, Tripura leh Meghalaya-a mihring awmzat ti danglam tham an lut tih an sawi bawk.

India leh Bangladesh ramri vengtu, Border Security Forces (BSF) chuan ramriah venhimna uluk lehzualin an kalpui a, Director General Daljit Singh Chaudhary hoin Nilaini khan Tripura-Bangladesh ramria venhimna kalpui a nih dan leh an inralrin dante enfiah a ni. Hei bakah hian hmarchhak state dangah pawh dan loa lut an awm loh nan khauh lehzualin ramri ven hna hi kalpui a ni.