Meghalaya : Loneitute pui tura duan CM FARM+ tlangzarh

Meghalaya chhunga loneitute pui tura duan, CM FARM+ chu chief minister Conrad Sangma chuan August 7, Nilaini khan Parish Hall, Nongpoh-ah a tlangzarh. Meghalaya agriculture minister, Ampareen Lyngdoh chu tlangzarhnaah a tel bawk.

He hmalakna hi state flagship programme thar tur niin loneitute dinhmun chawikang tura hmalakna a ni ang. CM FARM+ kaltlang hian loneitute tan hamṭhatna hrang hrang siamsak tum a ni a, heng zingah hian thlai man to chingtute tana ṭanpuina pek, lo neih dan kalhmang ṭha zawk inzirtir leh thlai tam zawk thar thei tura inzirtir te pawh a tel dawn a ni.

Loneituten thlai chinna hmun zau zawk an neih theih nan leh state-thar chhuah a tam theih nana hmanrua an mamawh pek leh sum hmanga ṭanpui ṭhin an ni ang. CM Sangma chuan tlangzarhna inkhawma thu a sawiah, state chhunga mipui 70% chu lo neih leh a kaihhnawih hmanga ei zawng an ni tih a sawi a, hemi avang hian mipuite hmasawn nan lo neih kawnga eizawngte puih chu a ngai a ni, a ti.

CM FARM+ kaltlang hian loneituten thlai chi ṭha awm loh vanga harsatna an tawh ṭhin chu sutkian tum a ni. Loneitute chuan a hun takah thlai chi ṭha dawng turin an pui dawn tih a sawi. An hmalakna chu thui tak thlira kalpui a nih thu sawiin a hlawhtlinna chu hun rei tak chhung state chhunga loneitute chuan an tel theih a beisei tih a sawi bawk.

Sangma chuan he program hnuaiah hian ram hectares 10,000 vel thlai chinna hmuna siam belh tum a ni tih sawiin, hemi atan hian Rs vbc 300 ruahman a ni, a ti. He program hi thingtlang khaw tinah a tahtawlin kalpui a ni dawn a, loneitute sum lakluh chu a leta tihpun an tum thu CM-in a sawi bawk.