Tripura : Panchayat inthlan neih a ni

Tripura-ah nimin khan panchayat chhawng thum- Gram Panchayat, Panchayat Samiti leh Zila Parishad a mipuite aiawh tur thlanna neih a ni. Vote hi zing dar 7 aṭanga tlai dar 4 thleng thlak a ni. Vote tlate hi kar leh Thawhṭanniah chhiar a ni ang.

Tripura State Election Commission (SEC) chuan panchayat chhawng thuma seat awm zat 6,909-ah state chhunga sorkarna siamtu, Bharatiya Janata Party (BJP) chuan chuhtu awm loin seat 4,805 an la tawh tih a tarlang. BJP hian Gram Panchayat-a seat awl 71% ah chuhtu awm loin hnehna an chang tawh a ni.

Gram Panchayat atan hian candidate 8,998 awmin, Panchayat Samiti-a seat awlte hi mi 783 in an chuh a, Zila Parishad atan candidate 384 an awm bawk a ni. BJP chuan seat tam zawkah chuhtu awm loin tling tawh mah se Communist Party of India (Marxist), Congress leh TIPRA Motha te nen seat la awlte an inchuh a ni.

Inthlanna ralmuang taka neih a nih theih nan venhimna khauh taka kalpui niin state police bakah Central Armed Police Force (CAPF) company 30 tirh luh belh an ni. SEC official chuan thuneituten inthlanna ralmuang taka an neih theih nan ṭan an la a ni, a ti.