Tripura-ah party pahnih inkarah buaina chhuak leh

Tripura-a rorellai Bharatiya Janata Party (BJP) leh Congress worker-te inkarah kar liam taa buaina a chhuah hnuin, Nilaini khan BJP leh CPIM worker-te an intibuai leh. 

Nilaini khan eptu, CPIM hian public distribution leh health­care system siamṭhat, hna nei lote hna siam leh thil dang phutin state pumah nawrh an huaihawt a, Agartala-ah chuan chief minister hlui Manik Sarwka hoin neih a ni. State chhunga hmun hrang hrang 282 ah nawrh hi an huaihawt a ni.  

Tripura police-te chuan buaina chhuahna hmun hrang hrangah mi 4,000 chuang an man. Assistant inspector general Subrata Chakraborty chuan South Tripura district leh Khowai district-ah nawrh huaihawtte leh BJP worker-te intihbuaina nasa tak a thlen avangin security force pawh dah belh an ngai hial niin a sawi bawk. 

CPIM hruaitute chuan BJP leh Indigenous People’s Front of Tripura worker-te chuan an worker-te hi an bei niin an sawi a, police-ah pawh FIR an thehluh nghal thu an sawi. Hetih lai hian BJP party thupuangtu, Nabendu Bhatta­charjee chuan eptu party-te chu buaina chawk chhuak tuah puhin, an ruahman lawk vek a ni, a ti. CPIM hruaitute chuan buaina siam tuma ruahmanna an siam lawk vangin an lakah FIR an thehlut tih a sawi bawk.