Oilfield Auction: AASU ten sorkar laipui thutlukna sut leh turin an ngen
All Assam Student’s Union (AASU) leh Asom Gana Parishad (AGP) te chuan Assam state chhung-a tuialhthei khur 12 zet chu sokar laipuiin lilam tura thupek a chhuah an duh loh thu an sawi hnu lawkah, Nilaini khan sorkar laipui chuan oilfield lilam chuan state economy-ah rah ṭha a chhuah zawk tur thu an sawi.
Industries leh Commerce Minister Chandra Mohan Patowary chuan Oilfield 12 lilam tura tih te hi micro leh mini oilfield te an ni a, mimal emaw company lian te kutah hlan a nih chuan state-in invesment cheng vaibelchhe 5,000 vel a hmu thei dawn a, chu chuan kawng tam takah hmasawnna a thlen dawn a ni a ti. State sorkar chuan royalty leh tax aṭang tein sum tam tham tak a hmu thei dawn a ni a ti bawk. Patowary chuan oilfield te hi mimal emaw company kutah hlan ni mah se kum rei lutuk an enkawl a rem dawn lo a, land rights chu tihdang-lam a ni dawn lo a ni a ti. Kum 1997-98 chhung khan exploration licensing policy chu siam ṭhat a ni a, he policy hmang hian India ram chhunga oilfield ṭhahnem tak chu lilam a nih tawh thu a sawi bawk.
Industries Minister Patowary chuan Assam-a pawl hrang hrang Numaligarh Refinery Ltd, Assam Gas Company, Assam Hydro Carbon leh Energy Company bakah company dangte chuan lilam hi an chhang thei dawn tih sawiin, state-in oil-a harsatna a tawh chu sutkian theih beisei a nih zawk thu a sawi. Numaligarh Refinery chu lian zawka thuam ṭhat a ṭul thu leh state sorkar chu oil-a a indaih lohna sukiang tura hma la tura a duh thu a sawi.
Hetihlai hian AASU te chuan an state chhunga oilfield te chu mimal kuta hlan an remti lo tih sawiin, sorkar laipui thutlukna chu sut leh tura an duh thu an sawi. State chhunga leilung hausakna awm te chu state sorkar kutah a awm tur a ni a, ham-
ṭhatna pawh a ram leilung faten an chhawr tur a ni an ti. AASU president Dipanka Kumar Nath leh general secretary Lurinjyoti Gogoi te chuan, Congress sorkar lai khan state sorkar chuan thutlukna dik lo a lo siam tawh tih sawiin, Numaligarh Refinery Limited-ah sate sorkar chuan 10% chiah state chuan a chang tih an sawi. Oilfield te chu mimal emaw company kuta hlan lo a, state sorkar chu tuna Assam-a inbun mek Oil India Limited leh Oil and Natural Gas Corporation Limited te vulh lian zawk tura an duh thu an sawi bawk.
Hetihlaihian Assam chief minister hlui Tarun Gogoi chuan, Ministry of Petroleum and Natural Gas hnenah Oilfield lilam tur te chu state chhunga company Assam Gas Company Limited, Assam Hydrocarbon and Energy Company Limited leh Assam Power Generation Company Limited te kutah hlan turin a ngen.
Thawhlehni khan Jorhat Press Club-ah press conference neih a ni a, Gogoi chuan sorkar laipui thutlukna chu a
ṭawmpui loh thu a sawi. Oilfield te chu state agency te kutah hlan ni thei se a duh tih sawiin, chhiah tam zawk lak a ni ang a, chu chu state tan kawng tam takah hamṭhatna a ni thei dawn niin a sawi. Gogoi chuan, Assam Gas Company Limited, Assam Hydrocarbon and Energy Company Limited leh Assam Power Ge-neration Company Limited te chu oilfield enkawl tur hian an ṭha tawk tih sawiin, hnathawktu leh bungrua pawh an nei ṭha tawk a ni a ti bawk.
Congress chief minister chuan an state-a BJP leh a thurualpui ten sor-karna thla khat an chelh chhunga an hna thawh te chu fakawm a tih thu a sawi a, zirtirtu lak leh Majuli bial district puitlinga hlankai a ni chu lawm-awm a tih thu a sawi. An term ṭha taka hmang zo tura a duh thu sawiin, mipuiin anmahnia rinna nghattute beisei ang ngeia kal turin a ngen a, thla khat chauh an la sorkar avangin fak chiam an la hun loh thu a sawi bawk.