AP-ah lei min avangin mi 10 an thi

Arunachal Pradesh-a West Kameng district Bhalukpong-ah Zirtawpni khan leimin nasa tak a thleng a, hriat theih chinah mi 10 in nunna an chan. Thi zingah hian naupang pathum telin, hmeichhe pali leh mipa pathum te chuan nunna an chan ve bawk.

Thi zinga naupang ber Angel Lenua chu thla kaw mi lek a ni a, midang Niky Boro (10), Juala Chetry (10), Pinky Boro (40) leh Miali Chetry (40) te nen hian Zirtawpni khan lak chhuah a ni. A hnuah Leel Bahadur Chetry (57), Dilip Gwala (15), Hiren Barman (54) leh a nupui Durga Barman (45) bakah an farnu Rina Barman (24) te chu lak chhuah ve leh an ni.

Zirtawpni khan Bhalukpong-ah hian nasa takin ruah a sur a, chhiatna hi a thleng zui ta a ni. Mi 10 an thih bakah hian chenna in eng emaw zat a tichhia a ni. Police, Army, BRO, ITBP leh NDRF te chuan chhanchhuah hna an thawk nghal a, district thuneitute chuan theihtawpin hma an la ve bawk. Ruah a sur reng avangin chhanchhuah hna hi a khaihlak a, Zirtawpni khan ruang panga lak chhuah niin, midang te hi a tukah lak chhuah a ni thung. Medical First Responder (MFR) leh Collapsed Structure Search and Rescue (CSSR) te chuan chanchhuahna hi theih ang angin an kalpui ve bawk. Leimin avang hian school building, circuit house leh PHE, PWD, WRD leh RWD department storehouse te chu a chhiat bakah police station chu a che nual bawk. India President Pranab Mukherjee chuan thi chhungte a tawrhpui thu a thawn nghal a, chhiat-na tuartute chu chawmdawlna ngaihtuahsak an nih tur thu a hrilh. Mukherjee chuan state sorkar chu a theih ang anga chhawmdawl hna thawk turin a ngen bawk.

State Governor J P Raj-khowa chuan vanduaina thleng chu pawi a tih thu sawiin, nunna chan chungte leh hliam tuar te a tawrhpui tak zet thu a sawi. Governor chuan ama relief fund aṭangin chhiat tawk te hnenah cheng nuai khat ṭheuh pek an nih tur thu a sawi. State sorkar leh District thuneitute chu leimin hlauhawmna hmuna chengte himna ngai pawimawh tura a duh thu Raj Bhawan chuan a sawi bawk. Chhiatna thlen lai hian Chief Minister Kalikho Pul chu New Delhi-ah a awm a, vanduaina thleng chu pawi a tih thu a sawi. Chief minister chuan vanduaina tawka nunna chan chhungte hnenah cheng nuai li ṭheuh pek an nih tur thu leh hliam tuarte chu cheng nuai khat ṭheuh state sorkarin a pek tur thu a sawi bawk.